La krakova universitata E-medio partoprenis ĉi-semajne la Eŭropan Tagon de Lingvoj en la fama Kopernik-Liceo, en la urbo Katowice (la ĉefa urbo de Supra Silezio). La liceo specialiĝas pri instruado de lingvoj – ĝi havas filologian karakteron kaj preskaŭ universitatan prestiĝon. Lernantoj de la liceo havas sufiĉe profundan intereson pri lingvoj.

La originon, diversajn aspektojn de E-o, ties praktikajn aplikojn ktp. prezentis la studento Filip Tarnawski. La gejunuloj ankaŭ aŭskultis specimenojn de la lingvo - fragmenton de la nacia epopeo "Sinjoro Tadeo" de A. Mickiewicz, en E-o (en nova radiofonia interpreto de Maria Majerczak) kaj kanton de la reprezentanta altan nivelon franca muzikgrupo Kore.

En la dua parto de la renkontiĝo okazis E-leciono, dum kiu estis atingitaj de la junulo konkretaj rezultoj.

Sekve de la sukcesa prezentado komenciĝas en la liceo E-kurso, prizorgata de la universitata E-medio en Krakovo.

Maria Majerczak, gvidantino de la studenta E-agado en Krakovo

P.S. Dezirante vidi fotojn, kiuj estos aldonitaj post pluraj tagoj, oni povos uzi http://www.kopernik.katowice.pl/wydarzenia kaj elekti: 2011/12 - Europejski Dzien Jezykow 2011.